အတွေးဆိုတာက လုပ်ဆောင်ချက်ရဲ့ ပင်မရင်းမြစ်ဖြစ်လို့ အတွေးကောင်းရင် လုပ်ဆောင်ချက်လည်း ကောင်းပါတယ်။

ကောင်းတာကိုပဲ တွေးနေတဲ့သူက ကောင်းတာတွေကိုသာ ပြောဖြစ်၊ လုပ်ဖြစ်နေလိမ့်မယ်ဆိုတာ အသေအချာပါပဲ။ အမြဲတမ်း ကောင်းတာတွေကိုချည်း ပြောမိ၊ လုပ်မိဖို့ ရာနှုန်းပြည့် မသေချာနိုင်ဘူးဆိုပေမဲ့ အများစုကတော့ ကောင်းတာတွေကိုပဲ ပြောမိ၊ လုပ်မိနေမှာတော့ သေချာပါတယ်။

ဒီလိုပါပဲ။ မကောင်းတာတွေကိုချည်း တွေးနေတဲ့သူကလည်း မကောင်းတာတွေကိုသာ အများအားဖြင့် ပြောမိ၊ လုပ်မိနေပါလိမ့်မယ်။
🔺🔺🔺

ပိုပြီးတွေးနိုင်သူ…
အထပ်ထပ်တွေးနိုင်သူ…
အနီးစပ်ဆုံးတွေးနိုင်သူ…
အမှန်ကန်ဆုံးတွေးနိုင်သူ…
ကွင်းဆက်ရှာပြီး တွေးနိုင်သူတွေကသာ ရှေ့ဆုံးပိုင်းကို ရောက်နေတတ်ကြတာ ဖြစ်ပါတယ်။

အတွေးဆိုတာ လုပ်ဆောင်ပြုမူချက်တွေထက် ပိုအရေးကြီးတာမို့ “ပြေးကြည့်တာထက် တွေးကြည့်တာက ပိုမှန်တယ်” ဆိုပြီး လူတချို့ကတောင် ပြောဆိုတတ်ကြပါသေးတယ်။
🔺🔺🔺

တွေးပါ…
အမြဲတမ်း တွေးပါ…
“ငါ ဘာကို လုပ်နေတာလဲ” ဆိုတာထက်…
“ငါ ဘာကို တွေးနေတာလဲ” ဆိုတာမျိုးကို သိရှိနိုင်အောင်သာ ကိုယ့်ကိုယ်ကိုယ် အမြဲတစေ ဆန်းစစ်နေသင့်ပါတယ်။
သင့်တော်တာ၊ မှန်ကန်တာ၊ ယုတ္တိဆန်တာဆိုရင် ကိုယ့်ရဲ့အတွေးကို ရှေ့ဆက်ပါ။ ပြီးရင် လုပ်ဆောင်ချက်အဖြစ် အကောင်အထည်ဖော်ပါ။

မသင့်တော်တာ၊ မမှန်ကန်တာ၊ ယုတ္တိမဆန်တာဆိုရင် ကိုယ့်ရဲ့အတွေးကို ဖျက်လိုက်ပါ၊ တစ်နည်းအားဖြင့် အတွေးဆိုးကို ပြောင်းလိုက်ပါ။ အတွေးဆိုးတွေကို ဘယ်တော့မှ အကောင်အထည်မဖော်မိပါစေနဲ့။
🔺🔺🔺

ဒီတစ်ခါ ကျွန်တော်ရေးတဲ့ စာအုပ်လေးဟာ ရှေ့စာအုပ်တွေနဲ့ မတူဘဲ ကွဲပြားနေမှာကိုတော့ ကြိုတင်အသိပေးပါရစေ။ ဒီစာအုပ်ထဲကနေ ဘာတွေ ရနိုင်ပါသလဲ။ ဒါက အဓိကသော့ချက် ဖြစ်ပါတယ်။

👉 အတွေးကဲတဲ့ အယူအဆတွေ…
👉 အတွေးကဲတဲ့ ဇာတ်လမ်းဇာတ်ကွက်တွေ
👉 အတွေးကဲတဲ့ ဖြစ်စဉ်တွေနဲ့ ယှဉ်တွဲဖော်ပြပေးထားတာဖြစ်လို့ ထူးကဲပြီး တန်ဖိုးရှိတဲ့ အတွေးမျိုးတွေကို ရရှိစေမှာ မလွဲဧကန်ပါပဲ။ ဇာတ်လမ်းဇာတ်ကွက်၊ ဖြစ်စဉ် တစ်ခုချင်းစီတိုင်းကနေ ဘယ်လို အတွေးတွေ ရလိုက်သလဲ။ အဲဒီကရတဲ့ အတွေးအပြင် ကိုယ့်အသိစိတ်၊ ကိုယ့်အာရုံမှာ အမှတ်မထင်ပေါ်လာတဲ့ လျပ်တစ်ပြက် အတွေးတွေက ဘာတွေလဲ။

အတွေးကောင်းလား…
အတွေးဆိုးလား…
ဒါကို စာဖတ်သူအနေနဲ့ စဉ်းစားဆုံးဖြတ်ရမှာ ဖြစ်ပါတယ်။ ပြီးရင် ကိုယ့်ဘဝ၊ ကိုယ့်အနာဂတ်၊ ကိုယ့်ရည်ရွယ်ချက်၊ ကိုယ့်တက်လမ်းအတွက် လိုအပ်သလို ဖဲ့ယူသုံးစွဲပုံဖော်သွားရမှာ ဖြစ်ပါတယ်။ အရေးအကြီးဆုံးက ဘယ်အချိန်မှာပဲဖြစ်ဖြစ် ကိုယ့်ကိုယ်ကိုယ် “ငါ ဘာကို တွေးနေတာလဲ” ဆိုပြီး အမြဲတမ်း ဆန်းစစ်နေဖို့ပါ။

ကိုယ့်ရဲ့ အတွေးတွေကို ရှင်းရှင်းလင်းလင်း သိမြင်နေမှသာ ကိုယ့်ရဲ့ လုပ်ဆောင်ချက်တွေကလည်း ပီပီသသ ဖြစ်တည်လာမှာ ဖြစ်ပါတယ်။