"ဒီနေ့ကငါ့ဘဝ"
ဒီစာအုပ်လေးထဲက အကြောင်းအရာတွေအားလုံးဟာ မိန်းမသားတွေရဲ့ ခံစားချက်တွေကို ကိုယ်စားပြုထားပါတယ်။ ကျွန်မတို့မိန်းမသားတွေအားလုံးက အိမ်ထောင်ကျပြီဆိုတာနဲ့ ကိုယ်ငယ်စဥ်က စိတ်ကူးယဥ်ခဲ့ဖူးတဲ့ အရာတွေကို မေ့လျော့လိုက်ကြပါတယ်။ ကိုယ့်အိပ်မက်တွေကို ဖန်တီးဖို့ထက် ကိုယ့်ရဲ့ အိမ်ထောင်ဖက်ကို ဘယ်လိုချစ်ပြီး ဘယ်လောက်ပေးဆပ်မလဲ။ ကိုယ့်သားသမီးတွေကို ဘယ်လောက်ထိ ဖြည့်ဆည်းပြီး အနစ်နာခံပေးဆပ်မလဲဆိုတဲ့ စိတ်ကူးတွေ အားကောင်းလာပါတယ်။ ဒီလိုနဲ့ မိန်းမသားဘဝနဲ့တန်ဖိုး၊ ကိုယ်ပိုင်ဘဝနဲ့ ကိုယ်ပိုင်ရည်မှန်းချက်တွေ ပျောက်သွားကြပါတယ်။ ကိုယ့်ကျန်းမာရေးအတွက် ကိုယ်မပူတော့ဘူး။ ကိုယ့်အနာဂတ်ဟာ ကိုယ့်သားသမီးတွေနဲ့ ကိုယ့်လင်သားအပေါ်မှာ မှီတည်နေပါတော့တယ်။ သားကိုသခင်၊ လင်ကို ဘုရားပုံစံ ကိုးကွယ်ယုံကြည်ကြတာပါ။ ဒီအတွေးမျိုးလောက်ပဲ တွေးနေတဲ့ အမျိုးသမီးတွေကို ဒီထက်ပိုကောင်းတဲ့ အတွေးမျိုးတွေ တွေးတက်ဖို့ ဒီစာအုပ်လေးက လမ်းပြပေးပါလိမ့်မယ်။

ကိုယ့်သားသမီးတွေနဲ့ ကိုယ့်ခင်ပွန်းလင်ယောကျ်ားကို ချစ်တဲ့နေရာမှာ ကိုယ့်ဘဝကို ဖျက်ဆီးပြီးချစ်ဖို့ထက် ကိုယ်ကိုယ်ကိုယ် လေးစားချစ်ခင်မှု၊ ကိုယ်ပိုင်ဉာဏ်ပညာနဲ့ ကိုယ်ပိုင်တောက်ပတဲ့ ကိုယ်ရည်ကိုယ်သွေးတွေကို ချပြပြီး မိသားစုရှေ့ကနေ ဦးဆောင်လမ်းပြ ချစ်တက်ဖို့ နည်းလမ်းကောင်းလေးတွေအများကြီး ထည့်ရေးထားပါတယ်။

မိန်းမသားဘဝဆိုတာ လင်ယူသားမွေး အိမ်မှုကိစ္စလောက်နဲ့ အချိန်ကုန်သွားဖို့ မဖြစ်နိုင်ပါဘူး။ အိမ်ထောင်ပြုလိုက်ပြီးတာနဲ့ ကျွန်မတို့ရဲ့ အလှအပတွေ၊ ဉာဏ်ပညာတွေ အားလုံးကို အိမ်ထောင်ကိစ္စတွေထဲ ပျောက်ဆုံးသွားတယ်ဆိုတာ သာမန်အတွေးမျိုးလောက်သာ ရှိနေသေးလို့ပါ။ ကျွန်မတို့အမျိုးသမီးတွေက အနာဂတ်ရဲ့ မျိုးဆက်သစ်တွေကို မွေးဖွားပြီး လူတော်လူကောင်းဖြစ်လာအောင် ပြုစုစောင့်ရှောက်ရတဲ့အတွက် သဘာဝကပေးထားတဲ့ မိခင်တစ်ယောက်ရဲ့ တာဝန်ကိုကျေပွန်အောင်ထမ်းနိုင်ဖို့ ကိုယ်တိုင် အသိဉာဏ်ပညာ ကြီးမားရပါတယ်။ ကိုယ့်ဘဝကို အောင်မြင်အောင် ကြိုးစားတည်ဆောက်ရပါတယ်။ ကိုယ်တိုင် ကျန်းမာလှပဖို့ ကိုယ်တိုင်ကြိုးစားရပါတယ်။ သားသမီးကိစ္စ အိမ်ထောင်ကိစ္စတွေထဲကနေ ထိုးထွက်ပြီး နှစ်ဆပိုသန်မာဖို့ ကြိုးစားရပါတယ်။ ရုပ်ပိုင်းဆိုင်ရာ ကျန်းမာလှပမှု၊ စိတ်ပိုင်းဆိုင်ရာ ကျန်းမာလှပမှု ရှိရမယ့်အပြင် မိသားစုရှေ့ကနေ မားမားမတ်မတ်ရပ်တည်နိုင်သော စိတ်ခွန်အားမျိုး ရှိရပါမယ်။ ဘဝမှာတွေ့ကြုံရင်ဆိုင်ရနိုင်တဲ့ အခက်အခဲတွေ၊ သောကတွေ၊ နာကျင်မှုတွေ၊ ဒုက္ခတွေကို ဖြတ်ကျော်နိုင်ရပါမယ်။ ဒီလိုစိတ်၊ ဒီလိုအတွေးမျိုး ဖြစ်လာအောင် TODAY IS MY LIFE "ဒီနေ့က ငါ့ဘဝ" ဆိုတဲ့ စာအုပ်လေးက အမျိုးသမီးတစ်ယောက်ရဲ့ ဉာဏ်ပညာ အလင်းတန်းကို ဖွင့်လှစ်ပေးပါလိမ့်မယ်။